Ityoophiyaa naannoo adda addaa keessatti Robaa gannaatiin walqabatee Daandiileen cituun ibsame.

Godina baalee magaalaa Roobeetti Khamisaa dabree rooba cimaa roobeen daandii fi manneen jireenyaa irratti midhaa dhaqabuu odeeffannoon argame ni addeessa. Daandiin magaalaa Roobee irra gara magaalaa Gooroo geessu cituudhaan, tajaajjilli geejjibaa addaan cituu gabaasni gamasirraa nudhaqqabe ni mul’isa.

Daandiileen magalaa keessaatis sadarkaan isaanii gadi bu’aa fi bo’iin lolaa kan seeraan hin qophaayin waan ta’eef, lolaa uumameen mana jireenya hedduu miidhuun gabaafameera.

Bulchiinsi magaalattii misooma bu’uuraa kan akka daandii, bo’oo lolaan keessa ya’uuf hin dhimmamu jechuun jiraattonni kan komatan tahuu gabaasni kun nimul’isa.

Haaluma walfakkaatuun daandiin guddaan magaalaa Roobee irraa gara Dalloomannaatti geessu, rooba gannaatiin cituudhaan hawaasni naannichaa rakkataa jirachuun himame. Sababa rakkina daandiitiin magaalaa Roobee irraa gara Dalloomannaa imaluuf hanga guyyaa 5 kan fudhatu tahuun maddeen naannawa irra gabaasaaniiru.

Godinni Baalee qabeenya uumamaatiifi oomishaa adda addaatiin badhaatuu yoo taatus, bu’uurri misoomaa sochii diinagdee godinichaa waliin wal madaalu kan hinjirre tahuus ibsameera.

#Ethio