Muslimoonni Addunyaa irra jiran, Saa’aa hagamiif Soomanu?

Ramadaanni baranaa nutti as dhihaatee jira. Hundi keenya hamilee gaariin eegutti jirra. Akkuma beekkamu Soomana jechuun baha aduu irraa kaasee hanga seensa aduutti, nyaataa fi dhugaatii akkasumas wantoota biroo kan Soomana keessa godhuun dhoowwame irraa fagaatuudha. Aduun ammoo akkaataan biyyoota garagaraa keessatti baatuu fi dhiituun garaagarummaa qaba.

Ammaan tana aduun gara Heemisfeera Kaabaatti waan argamtuuf, biyyoonni Heemisfeera kaabaa irra jiran Saa’aa dheeraa soomanu, biyyooni gara kibbaa jiran ammoo saa’aa gabaabduu soomanu. Akka fakkeenyaatti Yoo fudhanne, Ummaanni biyyoota Akka Arjantiinaa fi Chiili keessa jiru, Saa’aa 10 qofa aduu argatu. Kanneen Afriikaa Kibbaa fi Awustraaliyatti argaman ammoo Saa’aa 11 aduu argatu. Kanaafuu saa’aa 11 qofa soomanu jechuudha.

Itiyoophiyaan Mudhii lafaatti waan argamtuuf, aduu Saa’aa 14f argatti. Biyyoonni Arabaatis akkasuma. Ameerikaa fi Kaanaadaan Saa’aa 16 hanga 17 aduu argatti, Awurooppaan jiddu galeessaa ammoo hanga saa’aa 17. Ingiliiz Saa’aa 18, Noorweeyii fi Swiidin saa’aa 19 Soomanu jechuudha. Addunyaa irraa biyyi sa’aa dheeraa soomantu takka Raashiyaa gama Kaabaati. Muslimoonni Raashiyaa gama kaabaatti argaman Saa’aa 20 soomanu. Green land ammoo Saa’aa 21 aduu argatti.