JANNATAA FII IBIDDA

BALLINAA FII GADI FAGEENYA IBIDDAA

Ibiddi Jahannam akkaan balloodha, gadi fagoodha. Wanni kana hubachuu irratti nu qajeelchu: *Warri ibidda Seenan lakkoofsi isaanii lakkaawame hin dhumu. Lakkoofsi guddachuu wajjiin uumaan warra Ibidda seenutis akka malee gurguddaa taha. Jidduun ceekhuu lamaan nama tokkoo amana guyyaa sadii adda ballata, Ilkeen tokkoo gaara Uhud gaha. Guddina qaamaa kanaa wajjiin ilmaan namaa duraa hanga xumuraa warra Rabbi amanuu didee fi ajaja isaa irraan tarkaanfate hunda liqimsitee bakki biroo hafa. Rabbiin ol tahe akkana je’e: “Guyyaa Jahannamiin nuti jennu ‘sa guuttamtee?’ Isiin ni jetti ‘Sa dabaltiin jiraa’.” Qaaf: 30. Azaabni akka woofcoo (maashiin miidhaan daakhuu) kan miidhaan firii lakkoofsa hin qabne itti naqaa oolan daakhee ammas firii biroo daakhuuf eeggatuuti.

Hadiisa Bukhaarii fi Muslim gabaasan keeysatti Jannataa fii Ibiddi wal mormote, Rabbiin akkana jedhaan “Ati Azaaba kiyya siinin abbaa fedhe adaba, Isin lamaanuu nin guuta.”

*Gadii fageenya Isii irraa wanni Hadiisa keeysatti dhufe osoo dhagaan tokko afaan Jahannamii gadi darbame jala isii gahuuf amata 70 gadi deema. Nabiyyiin Sallallaahu aleeyhi wasallam akkana je’an: “Osoo dhagaan afaan Jahannamii gadi darbame Isii keeysa amata 70 gadi deema jala isii hin gahu.” Sahiihu Al-Jaami: 5124. *Guddina Ibiddaa irraa Malaaykoonni isii fidan guyyaa qiyaamaa akkaan hedduudha. Rabbiin ol tahe ibiddi akka guyyaa qiyaamaa fidamtu hoggaa himu akkana je’e: “Guyyaa san ni dhufama Jahannamiin” Al-Fajr: 23.

Rasuulli sallallaahu aleeyhi wasallam akkana je’an: “Guyyaa Qiyaamaa Jahannamiin ni dhufama haala Isiin cancala (sansalata isiin harkisan) kuma torbaatama qabduun, cancala san hundarratti Malaaykoota kuma torbaatamaatu jira (kan harkisu).” Sahiiha Muslim. Gad haa laallu hagam akka guddattu! Malaaykoota guddinaa fi jabeenya isaanii Rabbi qoftiin beekhu kuma torbaatamaatu haada isii tokko harkisa, isiin haada kuma torbaatama qabdi. Ibiddi akka malee guddoodha, warri isii seenus hedduudha. Rabbiin nu haa baraaru ibidda seenurraa.

Maddi: Al-Jannatu Wa An-Naar kan Dr. Umar Al-Ashqar qopheeyse.