Mootummaan Itiyoophiyaa muslimoota dararuu cimsee itti fufeera.

Guyyaa hardhaa magaalaa Finfinnee Masjiida Beeteel kan naannawa Kolfeetti argamutti, hawaasni muslimaa salaata juma'aa sodaa guddaan kan salaate tahuu, odeeffannoon naannawa irraa nu gahe ni addeessa.

Mootummaan Itiyoophiyaa yeroo ramadaanni gahu, baay’ina muslimoota masjiidatti walitti qabaman irraa ka’ee ni sodaata. Mormiin ciman ka’uu danda’a sababa jedhuunis, masjiidonni waraanaan akka marfaman godha. Haaluma kanaan guyyaa har’aatis, masjiidni Beeteel waraana mootummaan kan marfame ta’uu, odeeyfannoo arganne ni mul’isa. Masjiidni guutuu isaatiin, namoota alatti afatanii salaatuuf turanis dhoorkuun kan bittanneessan ta’uun beekameera.

Akka namni naannawa sanii duubisne nuf himetti: "Poolisoonni lakkoofsaan heddu tahan naannawa masjiidaa dhufanii marsuun, iddoo duraan ummanni itti afatee salaataa turetti yammuu afatu, afaa jalaa fuudhuun daddarbaa turan. Gochi isaan hardha raawwataa turan kun namoota hedduu rifachisee jira, kun immoo ammas mootummaan mataa hawaasa muslimaa irraa kan hin bu'in tahuu kan agarsiisuudha" jedha.

Mootummaan dhiheenya kana hooggantoota majliisa Ahbaashotaa waliin walgahii geggeessuun, naannoo adda addaatti masjiidoonni akka hin haaromfamne dhoorkuu isaatii fi masjiidota ummataa humnaan warra Ahbaashiitiif keennaa jiraatu isaa gabaasuun keenya ni yaadatama.