Bulchiinsi Kutaa Hawaay uggura Tiraamp biyyoota Muslimaa irratti baase mormuun himannaa bane.

Seera Pirezedaantii Ameerikaa yeroo lammataaf lammiiwwan biyyoota muslimaa 6 akka Ameerikaa hin seennee fi ji'a Afuriif baqattoonni akka Ameerikaa hin seenne jechuun mallatteesse bulchiinsi kutaa Hawaay mormuun mana murtii Federaalaatti himannaa kan bane tahuu Huffington Post gabaaseera.

Bulchiinsi kutaa Hawaay kun Seerri kanaan dura lammiiwwan Biyyoota muslimaa 7 akka Ameerikaa hin seenne jechuun bahe, manni murtii kan heera Ameerikaatti fudhatama hin qabne jechuun kan kuffisee fi kan yeroo lammataaf bahe kunis garaagarummaa tokkollee kan hin qabne waan taheef manni murtii Federaalaa kutaa Hawaay akka kuffisu jechuun kan gaafate tahuu gabaafameera.

Abbaan Seeraa Hawaay Derrick Watson, “Himannaan Bulchiinsi Hawaay Qajeelfama Pirezedaantiin Ameerikaa yeroo lammataaf lammiiwwan biyyoota muslimaa akka Ameerikaa hin seenne jechuun mallatteesse mormuun dhiheeffate fudhatama argate" jechuun ibseera.

Qajeelfamni Fulbaana 27 bahe ture mormii lammiiwwan Ameerikaa buufata Xiyyaaraa adda addaatti fi iddoo adda addaatti dhageessisaa turaniin manni murtii aanaa Siyaatiilii fi Manni murtii Fraansiiskoo kuffisuu ni yaadatama.

Kan yeroo lammataaf bahe kanas ummanni kan duraanii akka mormetti ammas bahe akka mormu jechuun dhaabbileen hawaasa muslimaa Ameerikaa keessa jiraaniif, akkasumas Manneen marii hawaasa muslimaa kutaa Ameerikaa adda addaa keessatti argaman waamicha kan godhanii fi mormii adda addaa karaa nagayaatiin geggeessuuf qophii irra jiraatuu ibsaniiru.