Turkitti Miseensota Waraana biyyattiitiif Hijaaba uffatuun heeyyamame

Dubartoonni Miseensa Waraana Turkii hijaaba rifeensa isaanii haguugu uffatuu akka danda’an Ministeerri Ittisa Turkii guyyaa Arba’aa beekisee jira. Akka Ministeerichaatti, Dubartoonni miseensa Waraana biyyatti ta’an, Koofiyaa jalaan, Hijaaba bifti isaa Yunifoormii waraanaatiin walfakkaatu uffatuu akka danda’an ibsee jira.

Haala kana dubartoonni miseensa Waraanaa fi qaamman ittisa biyyaa jalan jiran hundi hijaaba Yunifoormii isaaniitiin walfakkaatu uffatuu mirga argatanii jiran. Preezidant Rajab Xayib Erdogaan, eega aangoo qabatee as bakka heddutti hijaabni akka uffatamu heeyyamee jira. Isaan keessaa, miseensonni Paarlaamaa, Manneen barnootaa fi Poolisoonnis akka uffatan godheera. Eddoon Hijaaba uffatuun haga ammaa dhoorkaa itti ta’e Bakka waraanaa kana ture. Amma sunis kaafamee jira. Kanaa jechuun Turk keessatti bakka hundattuu Hijaaba uffatuun mirga guutuu ta’eera

Ministeera Ittisa biyyaa kan ta’e, Fikrii Isiik “Rakkoon hijaaba dhoorkuu waliin walqabatee jiru furamee jira. Dubartootni Hijaaba uffatuu barbaadan akka fedhii isaaniitti uffatuu ni danda’u” jedhe.

Turk keessatti Rakkoon Hijaabaan wal qabatee waggaa dheeraaf ture, bara 2010tti barattoonni Yunivarsiitiidhaa akka uffatan heeyyamuun takka jedhee furamuu jalqabe. Itti aansuun bara 2013tti dubartoonni qaamman mootummaa keessa jiran hundi uffatuu akka danda’an heeyyamame. Bara 2014 ammoo barattoonni Sadarkaa lammaffaa baratan akka uffatan heeyyamame. Haala Kanaan Mootummaan Preezidant Rajab Xayabiin hoogganamu, ajaja Islaamummaa kan ta’ee, Hijaaba Uffatuu dubartoota Turkiif guutumaan guututti kennee jira kennee jira.

--------------------- NuuralHudaa