Ibsi Mootummaa Kooriyaa kaabaa irraa kenname addunyaa yaaddessee jira.

Mootummaan Kooriyaa kaabaa guyyaa kaleessaa Misaayila guddicha Intercontinental ballistic missile (ICBM) Jedhamu yeroo barbaaddee fi iddoo barbaadde irratti dhukaasuu kan dandeessu tahuu ibsite.

Dubbii himaan ministeera dhimma alaa biyyattii ibsa guyyaa kaleessaa dhaabbata oduu biyyattiii KCNA jedhamu kenne irratti "Misaayila guddicha kana biyyaa fi yeroo barbaadnetti ajaja Mootii biyyattii irraa kennameen dhukaasa yaalii godhuuf qophii jiraa" jedha.

Barreessaan ministeera Raayyaa waraana Ameerikaa Ashton Carer ammoo Ameerikaan dhimma sagantaa kooriyaan kaabaa Misaayila guddicha kana dhukaasa yaalii godhuuf baafatte akka salphatti hin ilaaltu. Yoo dhukaasni kun daangaa Ameerikaa fi biyyoota michuuwwan isii irratti kan geggeeffamu tahe, Ameerikaan Misaayila kana ofirraa fashaleessuun tarkaanfii waraanaa akka fudhachuu dandeettu dubbate.

Warri xiinxalaa siyaasaa akka jedhutti mootummaan Kooriyaa waggoota dura yaalii dhukaasa Misaayila kanaa naannawa daangaa Ameerikaatti godhuuf fedhii akka qabdu dubbatu.