Rahmata Aalamaa kutaa 2ffaa

DOWNLOAD

• Rasuulli ﷺ duniyaa irraa akkaan nama dantaa dhabaadha turan, bolola isii xiqqamallee hin qaban, Isii irraa waanuma dhimma itti bahan qofaan if gahan, Duniyaa keeysatti jiruun itti jajjabaachuu san ni jaalatan, Osoo isaan fedhanii silla silaa Rabbiin gaarren dahabaa isaaniif godha.

• Mana Rasuulaa ﷺ keeysatti osoo ibiddi hin qabsiifamin baatiin takka dabartee baatiin biraa dabarti, ammas baatiin biraa itti aanti. baatileen sadii kan mana Isaanii kheeysatti Ibiddii hin qabsiifamne, Wanni jiraataniin bishaanii fi Timira qofa taatee. Rasuulli ﷺ duniyaadhaaf hangana dantaa dhaban.

• Rasuulli ﷺ guyyaa isaanii beelumaan dabarsan, Timiruma garaan guuttatanis kan hin arganne. Rasuulli ﷺ guyyaa sadii wal jala Biddeena/Qinxaa qamadii nyaatanii quufanii hin beekan.

• Rasuulli ﷺ hoggaa du’an Dirhaamaa fii Diinaara, Gabraa fii Gabriittii akkasuma waanuma qabeenya tahe tokkollee if duuba waan hambisan hin qaban. Gaangee takkaa fii meeshaa lolaa, dachii kheeybar jirtu tan sadaqaa godhan malee humaa hin lakkifne.

• Rasuulli ﷺ akkana je’an “Anaa fii duniyaa maaltu walitti nuuf jira, Ani duniyaa tana keeysatti akka nama yaabbatee (karaa deemuu) kan muka takka jalatti gaaddisiifatee malee waa hin taane, kan Gaaddisa san eegasii dhiisee biraa deemu.” Tirmiiziitu odeeyse hadiisni Sahiiha.

• Waan Ulamaa’iin Siiraa akkaataa jireenya Mana Rasuulaa ﷺ ilaalchisee kataban osoo lallee, namni hundi akkaataa jireenya Isaaniitirraa ni dinqisiifama, meeshaa duniyaa waa xiqqoo malee hin qaban, wanni ija namaa guutuu mana Rasuulaa ﷺ keeysatti qabeenyarraa hin jiru.

• Duuba kuni hundi wanni agarsiisu dhuguma Nabiyyii Rabbii tahuu Isaaniiti ﷺ, duniyaarra Waan Rabbiin bira isaaniif jiru filatan, Silaa Duniyaan Jaalala Rabbiitiin kan namaaf kennamtuutii, Rasuulli ﷺ nama addunyaa tanarra jiru cufa caalaa durooman ture.

• Bakki Teeysuma Rasuulaa ﷺ teeysuma adabaa fii obsaati turte, bakka amaanaa fii irra waliif dabruuti turte, sagaleen isii keeysatti ol fuudhamee hin lallabamu, wanni dhorgaa taate hundi, bakka teeysuma Rasuulaa ﷺ keeysatti hin argamtu, Rasuuulli salallaahu aleeyhi wasallam hoggaa dubbatan, warri wajjiin taa’u mataa gad qabatanii caqasan, akka waan mataa isaanii gubbaa shinbirroon qubatteeti, hoggaa rasuulli ﷺ dubbii isaanii xumuranii callisan qofa dubbatan.

• Sahaaboonni Rabbi irraa haa jaalatuutii, Rasuula ﷺ biratti wal hin falaman, Rasuulis ﷺ Waan sahaabota kofalchiisurraa ﷺ ni koflan, waan isaan dinqisiisurraa wajjiin diqisiifatan, Sahaabonnis Rabbiin hunda isaanii irraa haa jaalatuutii, bakka Rasuulli ﷺ jiranitti ni seeqatan. Sagalee ol fuudhanii hin koflan, Kabajaa Rasuulaatiis jecha. ﷺ

• Rasuulli ﷺ zikrii malee bakka taa’anii hin ka’an. Hogguu taa’anis zikrii malee hin taa’an, akko mootota addunyaa bakka teeysumaa addaa kan qopheeyfatan hin qaban, Rahmanni Aalamaa irra gaariin namaa, hoggaa Orma taa’utti dhufan, bakkuma teeysumaa argatan taa’an, Sanitti Sahaabotas Ajajan.

• Rasuulli ﷺ nama isaan wajji taa’e hundaaf qooda isaa ni kennaniif, sababaa kanaaf namni isaan wajjiin taa’e hundi, Isa caalaa kan Rasuulaa ﷺ biratti jaalatamu waa hin jirre saha. Nama isaan wajjiin taa’u ykn isaanitti haasawu ni obsaniif. hanga namni sun haasawa fixatee biraa ka’utti, Nama haajaa wahii Isaan gaafate haaja san baasaniif malee hin dhiisan ykn ammoo jecha gaariin itti dubbatanii ibsaniif.

• Rasuulli ﷺ ilmaan namaatiif qoma ballatan, haalaa fii amalaan Isaaniif laafuu irraa kan ka’e, hanga Abbaa Isaanii tahua gahan, haqa kheeysatti hundi Isaan biratti wal qixa, sodaa Rabbii qofaan Isaan biratti wal caalan.

• Rabbiin Subhaanahu wata’aalaa, Rasuulaaf ﷺ Qalbii Rahmataa kenneef, Rasuulli ﷺ laafaa namaatiif gara laafaadha, Miskinootaaf nahaadha, Ilmaan namaa hundaaf garaa laafan, Hanga Rahmataa fii gara laafinni Isaaniif akka xabiyaa (Amalaa) taatu geeyse, saniif jecha Rahmanni isaanii ﷺ xiqqaa fi guddaa wal geeyse.

• Rasuulli ﷺ Daa’immaniif garaa laafan, hanga hunda Isaaniitiif akka abbaa tahan takka, Isaan dhungatan, ifitti maxxanfatan, wajjiin taphatan, Timiraan Isaan dheengiyan.

• Rasuulli ﷺ hoggaa salaata seenan, yoo booyicha daa’imaa dhagayan salaata ni ariifachiisan dafanii fixuuf, ni laaffisan akka haadha irratti hin jajjabaaneef.

• Rasuulli ﷺ Daa’imman ni baa’atan, cinqii Isaanii irratti ni obsan, A’ishaan haati Mu’imtootaa akki jettu: “namni wahii daa’ima tokko Rasuula ﷺ tti fide, daa’imni huccuu Rasuulaa ﷺ irratti ficaane, Rasuullis ﷺ bakka fincaan tuqe san bishaan irra yaasan.” Bukhaariitu gabaase.

• Rasuulli ﷺ yoo daa’inmi irraa du’e ni gaddan, akkuma nama biroo gaddi tuyxu,isaanis ni tuyxi, garuu qadara Rabbii jaalachuu fii murtii Rabbii fudhatuun Isana biratti hin irrattu, Sabrii fii galata Rabbirratti hisaabbachuun cinatti, akkuma namoota kaanii gaddis itti dhagayama.

• Intala Rasuulli ﷺ Akaakoo tahaniif Umeeymaa bint Zeeynab, Intala Rasuulaa ﷺ hoggaa isiin sakaraata du’aa keeysa seente, Ijji Rasuulaa ﷺ imimmaan yaafte. Sa’ad bin Ubaadaa Rabbi irraa haa jaalatuu: “Yaa Rasuula Allaaha! maali kuni (imimmaan)?” je’een. Rasuulli ﷺ “Kuni Rahmata (rifannoota) Rabbiin qalbii gabroottan isaa kheeysa kaaye. Kan Rabbiin rahmata godhuuf gabroottan Isaatirraa warra rahmata godhuufi (rifannoota qabuuf)” je’aniin. Bukhaariitu gabaase.